የስንብት ዜና

August 09, 2018

 

ከነሐሴ 1997 ጀምሮ በየሳምንቱ ረቡዕ እየታተመ የሚወጣው "ሰንደቅ" ጋዜጣ ከህትመት ዋጋ ንረት ጋር ተያይዞ ከነሐሴ 1 ቀን 2010 ዓ.ም ጀምሮ እንዲዘጋ የድርጅቱ ባለአክስዮኖች ወስነዋል። ባለፉት ዓመታት መረጃ እና የማስታወቂያ ድጋፍ በማድረግ፣ ገንቢ ሂስ በመስጠት አብራችሁን ለነበራችሁ ሁሉ ምስጋናችን የላቀ ነው። የሰንደቅ ጋዜጣ የኤዲቶሪያል ቦርድ

አዲሱ የኢትዮ ኤርትራ ግንኙነት በርካታ ሀገራትንና ዓለም አቀፍ ተቋማትን ያስደሰተ ቢሆንም ጂቡቲን ግን ያላስደሰተ መሆን የደይሊ ኔሽን ዘገባ አመልክቷል። ዘገባው በሁለቱ ሀገራት አዲስ የሰላም ግንኙነት ኬኒያን ጨምሮ በርካታ ሀገራትና የተባበሩት መንግስታት ሳይቀሩ ደስታቸውን የገለፁ መሆኑን በማመልከት በጂቡቲ በኩል ግን ይህ ሁኔታ ያልታየ መሆኑን አመልክቷል።

 

ኤርትራ ከኢትዮጰያ.ቀደም ብሎም ከየመን ከዚያም ከጂቡቲ ጋር የድንበር ውዝግብ ውስጥ በመግባት ጦር መማዘዟን ተከትሎ እንደዚሁም በሶማሊያ የውስጥ ጉዳይ ሳይቀር ጣልቃ በመግባት ከአልቃይዳ ጋር ቀጥተኛ ትስስር አለው የሚባለውን አልሸባብን ሳይቀር ትረዳለች መባሉ ለተባበሩት መንግስታት የፀጥታው ምክር ቤት ማዕቀብ ዳርጓት ቆይቷል። ሆኖም በቅርቡ ከኢትዮጵያ ጋር ሰላም ማውረዷን ተከትሎ ከአስመራ ጉብኝታቸው መልስ ከተባበሩት መንግስታት ዋና ፀሀፊ አንቶኒዮ ጉተሬዝ ጋር በአዲስ አበባ የተገናኙት ጠቅላይ ሚኒስትር ዶክተር አቢይ አህመድ የመንግስታቱ ድርጅት በኤርትራ ላይ የጣለውን ማዕቀብ እንዲያነሳ መጠየቃቸው ይታወሳል።


ይሁንና እንደ ደይሊ ኔሽን ዘገባ ከሆነ ጂቡቲ ይህንን የኢትዮጵያ አቋም ክፉኛ ተቃውማለች። ከዚሁ ጋር በተያያዘ የጂቡቲ የውጭ ጉዳይ ሚኒስትር መሀመድ አሊ የሱፍ በሰጡት ማብራሪያ በኤርትራ ላይ የተጣለው ማዕቀብ የሚነሳ ከሆነ በሀገራቸው ላይ አሉታዊ ተፅዕኖን የሚያሳድር መሆኑን እንደገለፁ ዘገባው ጨምሮ ያመለክታል። ኤርትራ በተባበሩት መንግስታት የተጣለባት ማዕቀብ የሚያበቃው በመጪው ህዳር ወር 2011 ዓ.ም ሲሆን የጂቡቲም ስጋት ማዕቀቡ እንደተለመደው ላይራዘም ይችላል የሚል ነው።


ከሁለቱ ሀገራት የፖለቲካ ውዝግብ ባለፈ የኢትዮ ኤርትራን የድንበር ጦርነት ተከትሎ ሙሉ በሙሉ የጂቡቲ ወደብ ጥገኛ የሆነችው ኢትዮጵያ የኤርትራን ወደቦች ለመጠቀም ዝግጅት ማድረጓ ጂቡቲን ያሳሰባት መሆኑን መረጃዎች ያመለክታሉ። ጂቡቲ ባለፉት ሁለት አስርት ዓመታት በወደብ ኢንቨስትንመት ላይ ሰፊ ሥራን የሰራች ሲሆን አብዛኛው የኢትዮጵያን የወደብ ተጠቃሚነት ታሳቢ ያደረገ ነው። የኢትዮ-ኤርትራ የሰላም ግንኙነት ፍፁም ያልተጠበቀና ፈጣን መሻሻል ማሳየቱ የጂቡቲን ሰፊ ወደብ ነክ እቅዶች በተፈለገው ጊዜ ግባቸውን እንዳይመቱ የሚያደርግ ይሆናል።


ጂቡቲና ኤርትራ የተካረረ የፖለቲካ ውዝግብ ውስጥ የገቡት እ.ኤ.አ በ1990ዎቹ መጀመሪያ ራስ ዱሜራ በተባለ ግዛት የይገባኛል ጥያቄ መነሳቱን ተከተሎ ነው። ከዚሁ ጋር በተያያዘ ሁለቱ ሀገራት ጦር የተማዘዙ ሲሆን የኳታር ወታደሮች በአወዛጋቢው ክልል ለዓመታት በመስፈር ውዝግቡ ወደለየለት ጦርነት እንዳያመራ ጥረት ሲያደርጉ ቆይተዋል። የኢትዮ ኤርትራ የሰላም ስምምነት ተከትሎም ጂቡቲ የተባበሩት መንግስታት ከኤርትራ ጋር እንዲያሸማግላትና ሰላም እንዲወርድ እንዲያደርግ በይፋዊ ደብዳቤ ጥያቄ ማቅረቧ የሚታወስ ነው።

ፎቶ ካፕሽን

July 25, 2018


ጠቅላይ ሚኒስትር ዶ/ር ዐቢይ አሕመድ እና የኤርትራ ፕሬዝደንት አቶ ኢሳያስ አፈወርቂ ለኢትዮ-ኤርትራ ሠላም ላሳዩት ቁርጠኝነት የተባበሩት አረብ ኤምሬቶች (UAE) ከፍተኛ ሜዳልያን ተሸለሙ።


ሽልማቱን ያበረከቱላቸው የተባበሩት አረብ ኤምሬቶች (UAE) አልጋ ወራሽ ሼህ መሐመድ ቢን ዛይድ ቢን ሱልጣን አል-ናህያን ናቸው።

በኢትዮጵያ ኦርቶዶክስ ተዋህዶ ቤተክርስቲያን በሁለቱ ሲኖዶሶች መካከል የነበረው ልዩነት በዕርቀ ሰላም ወደ አንድነት ተመለሰ።

 

ባለፉት 27 ዓመታት በሁለት ሲኖዶሶች ስትመራ የቆየችውን የኢትዮጵያ ኦርቶዶክስ ቤተ ክርሲቲያን ወደ አንድ ለማምጣት የሰላምና የእርቅ ጉባዔው በዋሸንግተን ደብረ ሀይል ቅዱስ ገብርዔል ቤተክርስቲያን ባለፈው እሁድ የሁለቱም ልኡካን አባቶች በተገኙበት የጋራ ጸሎትና የመክፈቻ መርሐ ግብር ተጀምሯል።


ሲኖዶሶቹ ለሁለት በመከፈላቸው ምክንያት ችግር ላይ የነበሩ የእምነቱን ተከታዮች ወደ አንድነት ለማምጣት በሚቻልበት ሁኔታ ውይይት በማድረግ ወደ አንድነት ለመመለስ መስማማታውን የሰንደቅ ምጮች አስታውቀዋል። እንዲሁም በተጨማሪም "የሀገር ቤት ሲኖዶስ" እና "ስደተኛ ሲኖዶስ" የሚባለውን ለማስቀረት ተስማምተዋል።


በቅርቡ ወደ አሜሪካ ያቀኑትን የኢትዮጵያ ኦርቶዶክስ ተዋህዶ አሸማጋይ ኮሚቴ አባላትን ጠቅላይ ሚኒስትር ዶክተር አብይ አህመድ በፅህፈት ቤታቸው ማነጋገራቸው የሚታወስ ነው።


ይህ የሰላምና የእርቅ ጉባዔ እስከ አርብ ድረስ የሚቆይ እንደሆነና በውይይቱ መጨረሻ መግላጫ እንደሚሰጥ ነው የተገለፀው።

በኢትዮጵያ ንግድ ባንክ በየዕለቱ እስከ 6 ሚሊየን ዶላር የሚጠጋ የውጭ ምንዛሬ በየቀኑ እየተመነዘረ መሆኑ ታውቋል።

 

ጠቅላይ ሚኒስትር ዶክተር አቢይ አህመድ ግለሰቦች የያዙትን የውጭ ሀገር ገንዘብ በባንክ እንዲመነዝሩ መልእክት ማስተላለፋቸውን ተከትሎ የመጣ ከፍተኛ የምንዛሬ ለውጥ መሆኑን ባንኩ አስታውቋል።


በአሁኑ ወቅትም ሰዎች በተለያዩ የባንኩ ቅርንጫፎች በመገኘት የሚመነዝሩት እለታዊ የውጭ ምንዛሬ መጠን ከ4 ሚሊየን እስከ 6 ሚሊየን የአሜሪካ ዶላር እንደሆነ ነው ያስታወቀው።

የደቡብ ብሔር ብሔረሰቦችና ሕዝቦች ክልል ምክር ቤት አቶ ሚሊዮን ማቲዎስን የክልሉ ርዕሰ መስተዳድር አድርጎ በትላንትናው ዕለት መረጠ።

 

የቀድሞ ርዕሰ መስተዳድር አቶ ደሴ ዳልኬ ከኃላፊነታቸው የተነሱት ለሌላ ኃላፊነት በመታጨታቸው ነው ተብሏል።


አቶ ሚሊዮን ማቲዎስ ቀደም ሲል የሀዋሳ ከተማ ከንቲባ፣ የሲዳማ ዞን ዋና አስተዳዳሪ፣ የትምህርት ቢሮ ኃላፊ እና የመንገድ ትራንስፖርት ቢሮ ኃላፊ በመሆን ያገለገሉ ሲሆን በአሁኑ ወቅት ደግሞ የመንገድና ትራንስፖርት ሚኒስቴር ሚኒስትር ዲኤታ ሆነው በማገልገል ላይ ነበሩ።


አቶ ሚሊዮን ቃለ መሃላ ከፈጸሙ በኋላ የተጓደሉ የመስተዳድር ምክር ቤት እጩ አባላትን ለምክር ቤቱ አቅርበዋል። በዚሁ መሠረት አቶ ኤሊያስ ሽኩር የክልሉ ምክትል ርዕሰ መስተዳድርና የፐብሊክ ሰርቪስና የሰው ሀብት ልማት ቢሮ ኃላፊ፣ አቶ መንድሙ ገብሬ የጸጥታና አስተዳደር ቢሮ ኃላፊ ሆነው እንዲሾሙላቸው ለምክር ቤቱ አቅርበው ሹመታቸውን አስፀድቀዋል።


አቶ ሚሊዮን ማቲዎስ በቅርቡ ክልሉን የሚያስተዳድረው የደቡብ ኢትዮጵያ ህዝቦች ዴሞክራሲያዊ ንቅናቄ/ደኢህዴን/ ምክትል ሊቀመንበር ሆነው መመረጣቸው ይታወሳል።

አሜሪካ በተለያዩ ምክንያቶች ከመኖሪያ ቀያቸው ለተፈናቀሉ ኢትዮጵያውያን የሚሆን የ170 ሚሊየን ዶላር ድጋፍ ማድረጓን አስታወቀች።

 

የተሰጠው ድጋፍ በሚሊየን ለሚቆጠሩ ኢትዮጵያውያን አስቸኳይ የምግብ እርዳታ፣ የህክምና ድጋፍ እና ንፁህ የመጠጥ ውሃ አቅርቦት ይውላል ተብሏል። በተለይ ገንዘቡ በሀገሪቱ በተለያዩ ግጭቶች ለተፈናቀሉ በሚሊየን ለሚቆጠሩ ዜጎች የሚውል እንደሆነ በኢትዮጵያ የአሜሪካ ኤምባሲ ይፋ አድርጓል።


ከፈረንጆቹ 2016 ጀምሮ የአሜሪካ መንግስት በኢትዮጵያ ለሰብዓዊ ድጋፍ 802 ሚሊየን ዶላር ድጋፍ ማደረጉ ተገልጿል።

ኖርዝ ኢስት ኤቨንትስ ከአዲስ አበባ ዩኒቨርሲቲ እና ከብሔራዊ ቤተመዛግብትና ቤተመጻህፍት ኤጄንሲ ጋር በመተባበር ዘንድሮ ለ2ኛ ጊዜ ያዘጋጀው የሆሄ የሥነጽሑፍ ሽልማት የ2009 ዓ.ም. ምርጥ መጻህፍት ዕጩዎች ይፋ ሆነዋል። የሽልማት ዝግጅቱ አዲስ አበባ ዩኒቨርሲቲን ጨምሮ ከተለያዩ ከፍተኛ የትምህርት ተቋማት የተውጣጡ የሥነ ጽሑፍ ምሁራን፣ ታዋቂ ደራሲያን እንዲሁም የሥነ ጽሑፍ ባለሙያዎች የተውጣጣ የዳኞች ኮሜቴ በማዋቀር ለውድድሩ የተመዘገቡ መጻሕፍትን ሲገመግም ለሶስት ወራት ቆይታ አድርጓል።

 

በዚህ ዓመት የሆሄ ሽልማት በ2009 ዓ.ም የታተሙ በረጅም ልብ ወለድ ዘርፍ 19 መጻሕፍት፣ በልጆች መጻሕፍት ዘርፍ 17 እንዲሁም በግጥም መጻሕፍት ዘርፍ 24 መጻሕፍት ለውድድር ተመዝግበው ከእያንዳንዱ ምድብ 5 ምርጥ መጻሕፍትን ለመለየት በዳኞች ጥልቅ ግምገማ ሲካሄድ ቆይቷል።


በዚህም መሰረት በረጅም ልብ ወለድ ዘርፍ የሚከተሉት መጻሕፍት ምርጥ 5 መጻሕፍት ተብለው ተመርጠዋል።

 

 

Ø ስማርድ- በንጉሴ መኮንን
Ø አለመኖር - በዳዊት ወንድማገኝ (ዶ/ር)
Ø ጌርሳም - በዘርዓ ሰብሣጌጥ
Ø ዘርቆርጣሚው - በአለማየሁ በላይ
Ø በፍቅር ስም - በአለማየሁ ገላጋይ

በግጥም መጻሕፍት ዘርፍ የሚከተሉት አምስት መጻሕፍት በዕጩነት የተመረጡ ናቸው።

Ø የተገለጡ አይኖች - ሰለሞን ሞገስ
Ø የማለዳ ድባብ - በዕውቀቱ ስዩም
Ø ከሴተኛ አዳሪ የተኮረጀ ሳቅ- በላይ በቀለ ወያ
Ø የሀገሬ ንቅሳት - ሙሉዓለም ተገኘ ወርቅ
Ø ነፋስያነሳው ጥላ - ብርሀነስላሴ ከበደ

 

በልጆች መጻሕፍት ዘርፍ የምድቡ ዳኞች 5 መጻሕፍትን የመረጡ ሲሆን መጻሕፍቱም የሚከተሉት ናቸው።

 

Ø ቴዎድሮስ ፡ኡጋዝመሐመድ - በዳንኤል ወርቁ
Ø አባባ ትልቁና ሌሎች ትምህርታዊ ተረቶች- በየሺመቤት ካሳ
Ø አሻንጉሊቴ - በዓለም እሸቱ
Ø የጎመጀ ጅብ - በዓለም እሸቱ
Ø ልዋም - በሠማላዊትሐጎስ

 

ከየዘርፉ አንደኛ የሚወጡትን የመጨረሻዎቹን አሸናፊዎች ለመለየት በዳኞች ከሚደረገው ዳግም ግምገማ በተጨማሪ ከአንባቢያን የሚሰበሰበው ድምጽ ከአጠቃላይ ውጤቱ 20 በመቶ የሚይዝ ሲሆን አንባቢያን በአጭር የጽሁፍ መልዕክት 8240 ላይ ha የሚለውን ኮድ በማስቀደም አሸናፊ መሆን ይገባዋል የሚሉትን መጽሐፍ ርዕስ እስከነ ሐሴ 5 ቀን 2010 ዓ.ም. ድረስ መላክ ይችላሉ።


የሽልማት ፕሮግራሙ ነሐሴ 7 ቀን 2010 ዓ.ም. ከምሽቱ 11፡00 ሰዓት ጀምሮ በኢትዮጵያ ብሔራዊ ቴያትር ይካሄዳል። በሽልማቱ ላይ ከመጻሕፍቱ በተጨማሪ ለሥነጽሑፍ እድገት እና ለንባብ ባህል መዳበር የላቀ አስተዋጽ ኦያበረከቱ ግለሰቦች እና ተቋማት እውቅና ይሰጣቸዋል። የሽልማት ዝግጅቱ በኢቢኤስ ቴሌቭዥን በኢትዮጵያ እና በመላው አለም ላሉ ተመልካቾች የሚተላለፍ ይሆናል።


ከሽልማቱ ጋር የተያያዙ መረጃዎችን በየጊዜው ለማግኘት የሽልማቱን የፌስቡክ ገጽ www.facebook.com/Hohe-Awards እንዲሁም በሽልማቱ የትዊተር አድራሻ @HoheAwards መከታተል ይቻላል።


ባለፈው ዓመት ነሐሴ ወር ላይ በተካሄደው የመጀመሪያው የሆሄ የሥነጽሑፍ ሽልማት የአዳም ረታ የስንብት ቀለማት በረጅም ልብ ወለድ፣ የአበረ አያሌው ፍርድ እና እርድ በግጥም እንዲሁም የአስረስ በቀለ የቤዛቡችላ በልጆች መጻሕፍት ዘርፍ አሸናፊ እንደነበሩ ይታወቃል።

"ጎንደርን ፍለጋ" በአንድ ስም ወደሚጠራ የተለያየ አካባቢ በተለያየ ጊዜ የተደረገ ጉዞ የማስታወሻ ጥርቅም ነው። በበጋ ወደ ናበጋ የአለቃ ገብረሃናን የትውልድ ቀዬ ፍለጋ የተሄደ። ጎንደር አያል ተባባል እያለ ስለሚያወድሰው ጀግና ስለ ደጃች አያሌው ብሩ /አያሌው ሞኙ/ ከትውልድ ቀዬ እስከ ጦር አውድ የሚጓዝ የታሪክና የጉዞ ዘገባ። የኢማም አህመድ /ግራኝ መሐመድ/ ሠራዊት ያላጠፋቸው የጎንደር ቤተክርስቲያናትና የኢማሙ ስጦታዎች፣ ደንቢያን የሚፈትሽ፣ ሰሜን አናት ወጥቶ ደረስጌን የሚቃኝ። የፋርጣን ድንቅ ምድር፣ የፎገራን ውበት፣ የጣና ቂርቆስን ታሪክ፣ የሬማን በረከት፣ ቅዱስ ላሊበላ በጎንደር ጀምሮ ያልጨረሳቸውን ውቅሮች፡ ስለ አርባ አራቱ ታቦታት፣ ሀረርና ጎንደር፣ የሐማሴን አባት ሆነው ኤርትሪያን ስለፈጠሩት የደንቢያ ወታደሮች፣ ስለ ታላቁ ሼህ ስለ ሼህ አሊ ጎንደር ሌላም ሌላም.... በመፅሐፉ ተካተውበታል።

Page 1 of 111

ድርጅትዎ ያስተዋውቁ!

  • Advvrrt4.jpg

እዚህ ያስተዋውቁ!

  • Aaddvrrt5.jpg
  • adverts4.jpg
  • Advertt1.jpg
  • Advertt2.jpg
  • Advrrtt.jpg
  • Advverttt.jpg
  • Advvrt1.jpg
  • Advvrt2.jpg

 

Advvrrt4

 

 

 

 

Who's Online

We have 609 guests and no members online

Sendek Newspaper

Bole sub city behind Atlas hotel

Contact us