You are here:መነሻ ገፅ»ዜና

የዜጋውን ውለታ ያልዘነጋ ጠቅላይ ሚኒስትር

-    በሺዎችና በሼሁ ነፃ መውጣት የተገለጸው የዜግነት ክብር

ሙሉ ጽሁፉን በፖለቲካ ዓምድ ላይ ይመልከቱ

 

ጠ/ሚ አብይ አሕመድ ለሠላማዊ ድርድር በጋበዙት መሠረት በአንድ ወቅት የኦሮሞ ነፃነት ግንባር (ኦነግ) ከፍተኛ አመራር የነበሩትና በአሁኑ ወቅት የኦሮሞ ዴሞክራቲክ ግንባር ተብሎ የሚጠራ ፓርቲ መሪዎች የሆኑ አምስት ሰዎች ዛሬ ረቡዕ ማለዳ ለተጨማሪ ድርድር አዲስአበባ እንደሚገቡ ተሰማ።

በዛሬው ዕለት ይገባሉ ከተባሉት መካከል፡- አቶ ሌንጮ ለታ (የኦነግ ዋና ፀሀፊ የነበሩ)፣ ዶ/ር ዲማ ነጎዎ (የኦነግ ሊቀመንበር የነበሩ)፣ ዶ/ር በያን አሶባ (የኦነግ ቃል አቀባይ የነበሩ)፣ ዶ/ር ሀሰን ሁሴን (የኦነግ አመራር አባል የነበሩ)፣ አቶ ሌንጮ ባቲ  (የኦነግ ቃል አቀባይ የነበሩ) እንደሚገኙበት ምንጮቻችን ጠቁመዋል።

   የኦሮሞ ዲሞክራሲያዊ ግንባርን ተከትለዉ፣ በጄኔራል ኃይሉ ጎንፋ፣ በጀኔራል ከማል ገልቹ፣ በአቶ ገላሳ ዲልቦ የሚመሩ የኦሮሞ ድርጅቶችም በቅርቡ ወደሀገር ገብተው ተመሳሳይ ድርድር በማድረግ ሠላማዊ ትግሉን ይቀላቀላሉ ተብሎ ይጠበቃል።

የኢትዮጵያ መንግሥት ከሳምንታት በፊት ከኦሮሞ ዴሞክራቲክ ግንባር አመራሮች ጋር በዋሽንግተን ዲሲ የመጀመሪያውን ድርድር ያካሄደ ሲሆን የተደረገው ድርድር የተሳካና ሃገራዊ መግባባት የሰፈነበት እንደነበር የመንግስት ኮምኒኬሽን ጉዳዮች ጽ/ቤት ባወጣው መግለጫ መጥቀሱ የሚታወስ ነው።¾

“በማንነት ላይ የሚደረግ ማፈናቀል ይቁም”

ሰማያዊ ፓርቲ

በይርጋ አበበ

ማንነትን መሰረት ያደረገ የዜጎች መፈናቀል እንደሚያሳስበውና ድርጊቱም ለአንዴና ለመጨረሻ ጊዜ እንዲቆም ሰማያዊ ፓርቲ ገለጸ።

ፓርቲው ትናንት ማክሰኞ በጽ/ቤቱ በሰጠው ጋዜጣዊ መግለጫ “በዘርና በቋንቋ የኢትዮጵያን ህዝብ በመከፋፈል የአገዛዝ እድሜውን በማራዘም የቀጠለው አምባገነኑን የአህአዴግ አገዛዝ ለዘመናት ተዋዶና ተፈቃቅዶ የኖረውን የአገራችንን ህዝብ ማህበራዊ እሴቶችና ግንኙነቶችን በፈጠራ ታሪኮች፣ በተንኮልና በጥላቻ በመበረዝ የአገር አንድነት በማናጋት አገዛዙ የዜጎችን ሰላማዊ ኑሮ ክፉኛ እያናወጠው ይገኛል” ብሏል።

ፓርቲው በመግለጫው አክሎም “የኢህአዴግ አገዛዝ ለአንዴና ለመጨረሻ ጊዜ እንዲያከትም የተጀመረው ህዝባዊ ትግል ተጠናክሮ እንዲቀጥል የበኩሉን አስተዋጽኦ እያደረገ ይገኛል” ያለ ሲሆን በተለያዩ የኢትዮጵያ ክፍሎች በዜጎች ላይ ኢ-ሰብአዊ ጥቃት እየተፈጸመ ይገኛል፤ ይህም በአገዛዙ የታች ሹሞች እና ተልዕኮ ፈጻሚዎች አማካኝነት እየተከወነ መሆኑን አስታውቋል።

ኢህአዴግ በ1983 ዓ.ም ስልጣን ከያዘበት ጊዜ ጀምሮ በመላው የአገሪቱ ክፍሎች የደረሱ የዜጎችን ሞት፣ መፈናቀል፣ መታሰርና መሰደድ የዘረዘረው ሰማያዊ ፓርቲ፤ ይህን ድርጊትም ፓርቲው በጽኑ ሲያወግዘው መቆየቱን ገልጿል። ድርጊቱንም “የአገዛዙን የጥላቻ ዘር በግልጽ ያሳየ መጥፎ አጋጣሚ ጭምር ነው” ያለው ሰማያዊ ፓርቲ፤ ‹‹የአገዛዙ ግፍ እና በደሎች ከትላንት ዛሬ እየከፋ መጥቶ ዜጎች ለዘመናት ሲኖሩ ከነበሩበት አካባቢ እንዲፈናቀሉ እየተደረገ ይገኛል። ዛሬም በአማራ ማህበረሰብ ተወላጆች ላይ በገዥው ፓርቲ የሥራ ኃላፊዎች ትዕዛዝ ሰጪነት እየተፈጸመባቸው የሚገኘውን እጅግ አስከፊ ኢ-ሰብአዊ ድርጊት ሰማያዊ ፓርቲ በጽኑ ያወግዛል›› ብሏል።

ሰማያዊ ፓርቲ በመግለጫው መጨረሻም በቅርቡ በቤኒሻንጉል ጉሙዝ ክልል መተከል ዞን ድባጤ ወረዳ ዝግህ በሚባል አካባቢ ከብት ጥበቃ ላይ በነበረ የ14 ዓመት ታዳጊ የደረሰውን የ“መሰለብ” እና ዐይኑን የማጥፋት ድርጊት በጽኑ ኮንኖ ድርጊቱን የፈጸሙትም ለህግ እንዲቀርቡ ጠይቋል።¾

 

የኤርትራ መንግስት ኢትዮጵያና ሱዳን የሀገሪቱን አማፅያን በማገዝ የኤርትራን ሰላም ለማናጋት እየተንቀሳቀሱ ነው በማለት ላሰማችው ክስ በኢትዮጵያ መንግስት በኩል የማስተባበያ ምላሽ ተሰጥቶበታል።

በዚሁ ዙሪያ ለቻይና ዜና አገልግሎት ዤኑዋ ምላሽ የሰጡት የውጭ ጉዳይ ሚኒስትር ቃል አቀባይ አቶ መለስ ዓለም የኤርትራ ውንጀላ ሀሰትና መሰረት የለሽ ነው በማለት ክሱን አስተባብለዋል። ቃል አቀባዩ አክለውም ሁለቱ ሀገራት በዝግ ሁኔታ ውስጥ ቢሆኑም ኢትዮጵያ ከኤርትራ ጋር ያለምንም ቅድመ ሁኔታ ለመደራደር ዝግጁ መሆኗን አመልክተዋል።

የኤርትራ ውጭ ጉዳይ ሚኒስትር ቀደም ብሎ ባወጣው መግለጫ የኢትዮጵያና የሱዳን መንግስታት የኤርትራ አማፅያንን አስታጥቀው ጥቃት እንዲሰነዝሩ ለማድረግ ያሴሩ መሆኑን ገልፆ ነበር።

በሌላ ዜና ሱዳን የአየር ኃይሏን ለማጠናከር ከሰሞኑ FTC2000 በመባል የሚታወቅ የስልጠና እና የጥቃት ማድረሻ ተዋጊ ጀት ግዢ የፈፀመች መሆኑን የሱዳን ትሪብዩን ዘገባ አመልክቷል። የተዋጊ አውሮፕላኖቹም አቀባበል ሥነ ሥርዓት የተከናወነ መሆኑ ታውቋል። እንደዘገባው ከሆነ የሱዳን መንግስት ፊቱን ወደ ቻይና በማዞር ከዚህ ቀደምም የበርካታ ተዋጊ አውሮፕላኖችን ሸመታ በተለያዩ ዙሮች ያከናወነች ሲሆን፤ ከዚህም በተጨማሪ በያዝነው የፈረንጆች ዓመት መጨረሻ የሩስያን ኤስዩ-30 እና ኤስዩ-35 የተባሉ ተዋጊ አውሮፕላኖችን ከራሷ ከሩስያ ለመግዛት እንቅስቃሴ የጀመረች መሆኑን ይሄው የሱዳን ትሪብዩን ዘገባ ጨምሮ ያመለክታል።¾

በአገሪቱ እየተባባሰ የመጣውን የዋጋ ንረት ተከትሎ በአዲስ አበባ ከተማ የሚገኙ የግል (የንግድ) ትምህርት ቤቶች በዓመት እስከ 12 ሺ ብር የሚደርስ ጭማሪ ማድረጋቸውን ለወላጆች በመግለጽ ላይ መሆናቸው ተሰማ። ከአዲስ አበባ ከተማ አስተዳደር የአጠቃላይ ትምህርት ጥራትና አግባብነት ሬጉላቶሪ ኤጀንሲ የተገኘ መረጃ እንደሚጠቁመው በቀጣዩ አዲስ ዓመት (በ2011) በከተማዋ ካሉ የግል ት/ቤቶች መካከል 707 ያህሉ የዋጋ ጭማሪ እንደሚደርጉ ታውቋል።¾

 

-    ፓትርያርክ አቡነ ማትያስ በሩሲያ የ6 ቀናት ጉብኝት አድርገዋል

 

ከ120 ዓመታት በላይ ያስቆጠረውን የሁለትዮሽ ግንኙነታቸውን ዳግም ለማስቀጠል የተስማሙት የኢትዮጵያ ኦርቶዶክስ ተዋሕዶ ቤተ ክርስቲያንና የሩስያ ኦርቶዶክስ ቤተ ክርስቲያን፤ በደቀ መዛሙርትና በሊቃውንት ልውውጥ የስኮላርሽፕ ትብብራቸውን ለማጠናከር ተስማሙ።

የፓትርያርኩ ልዩ ጽ/ቤት እንዳስታወቀው፤ ብፁዕ ወቅዱስ አቡነ ማትያስ፣ የሞስኮና መላው ሩሲያ ፓትርያርክ ክሪል ባደረጉላቸው ሐዋርያዊ ግብዣ መሠረት፣ ከግንቦት 7 እስከ 13 ቀን 2010 ዓ.ም ያካሔዱትን የ6 ቀናት ጉብኝት አጠናቀው የተመለሱ ሲኾን፤ የቆየውንና በመካከሉ የቀዘቀዘውን የሁለትዮሽ ግንኙነት ዳግም ለማስቀጠል፣ የተማረ የሰው ኃይልም ለማፍራት የነጻ ትምህርት ዕድሉን ለማጠናከር ከስምምነት ተደርሷል።

የፓትርያርኩ ጉብኝትና የሁለቱ አብያተ ክርስቲያናት ግንኙነት የአገራቱን ረጅም ዲፕሎማሲያዊ ግንኙነትንም እንደሚያጠናክረው የጠቀሱት የውጭ ጉዳይ ሚኒስትሩ ሳርጌ ላብሮብም፣ ልዩ ልዩ የሥልጠና ዕድል እንደሚሰጥ ለፓትርያርክ አቡነ ማትያስ እንደገለፁላቸው መግለጫው አስፍሯል። ለዓለም ሰላም በጋራ ከመጸለይና ከመሥራት ባሻገር በማኅበራዊ ዘርፍና በልማትም ለመተባበር ከስምምነት መደረሱን ጠቁሟል። የፓትርያርኩ ልዩ ጽ/ቤት የላከው ሙሉ መግለጫ እንደሚከተለው ቀርቧል።

  

ብፁዕ ወቅዱስ አቡነ ማትያስ ቀዳማዊ ፓትርያርክ ርዕሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለሃይማኖት በሩሲያ ኦርቶዶክስ የሞስኮና መላው ሩሲያ ፓትርያርክ ክሪል ባደረጉላቸው ሐዋርያዊ ግብዣ የስድስት ቀናት ጉብኝት አድርገው ተመለሱ።

ቅዱስነታቸውና ልዑካኑ፣ በሞስኮ የአየር ማረፊያ ሲደርሱ፣ የሩስያ ቅዱስ ሲኖዶስና የኢትዮጵያ ፌደራላዊ ዴሞክራሲያዊ ሪፐብሊክ ባለሙሉ ሥልጣን አምባሳደር አቶ ግሩም አባይና የሥራ ባልደረቦቻቸው ደማቅ አቀባበል አድርገውላቸዋል።

የሞስኮና የመላው ሩሲያ ቅዱስ ፓትርያርክ ክሪል፣ ለቅዱስነታቸው በሞስኮ የመድኀኔዓለም ካቴድራል የእንኳን ደኅና መጡ ንግግር አድርገው የኢትዮጵያ ኦርቶዶክስ ተዋሕዶ ቤተ ክርስቲያን ታላቅ ቤተ ክርስቲያን ስትሆን በአባቶችና በእናቶች ጥንካሬ ተጠብቃ ለዓለም አርአያ ሆና የምትጠቀስ ቤተ ክርስቲያን መሆኗን ገልፀው፤ የፓትርያርኩና የልዑካኑ መምጣት ለነበረን ጠንካራ ግንኙነት ጥንካሬና ጉልበት ይሆነናል ብለዋል፤ ብፁዕ ወቅዱስ አቡነ ማትያስ ፓትርያርክ ቀደም ሲል የነበረው ግንኙነት በመካከሉ የቀዘቀዘ እንደነበር ጠቅሰው አሁን ወደነበረበት የሁለትዮሽ ግንኙነት ተጠናክሮ እንዲቀጥል የተማረ የሰው ኃይልም ለማፍራት የነፃ ትምህርት ዕድልም እንዲከፈት በአጽንኦት ገልጸዋል። የሩሲያ ቤተ ክርስቲያን ፓትርያርክም፣ የነበረ ግንኙነታችን ተጠናክሮ ይቀጥላል። የነፃ የትምህርት ዕድሉም ይሰጣል በማለት የገለፁ ሲሆን፤ በምዕራባውየን እየታየ ያለውን የክርስቲያናዊ ሕይወት ፈተና በጋራ የመቋቋም የሁለቱም አብያተ ክርስቲያናት ትብብር አስፈላጊ መሆኑን ገልጸዋል።

ቅዱስነታቸው በዕለቱ ከሩሲያው ፌዴሬሽን የውጭ ጉዳይ ሚኒስቴር ሚስተር ሳርጌ ላብሮብ ጋር ውይይት አድርገዋል፤ ቅዱስነታቸው የሁለቱን አብያተ ክርስቲያናት የቆየ ግንኙነት አብራርተው፣ በሀገር ደረጃም ከ120 ዓመታት በላይ ያስቆጠረ መሆኑን፣ በመካከል ግን እየቀዘቀዘ መምጣቱን ገልፀው፣ ይህን ግንኙነት ዳግም ለማጠናከር ቤተ ክርስቲያኗ በሰፊው እየሠራች እንደሆነ ገልፀውላቸዋል፤ ለዓለም ሰላም መጸለይ የዘወትር የቤተ ክርስቲያኗ ተግባር ቢሆንም፣ በሶርያና በአንዳንድ የሰሜን የአፍሪካ ሀገራት ሰላም እንደሚያስፈልግ ገልፀው በማኅበራዊ ዘርፍ በልማት በጋራ መሥራት እንዲሁም የተቋረጠው የትምህርት ዕድል በሚቀጥልበት ሁኔታ ተወያይተዋል።

የውጭ ጉዳይ ሚኒስትሩም የኢትዮጵያ ኦርቶዶክስ ተዋሕዶ ቤተ ክርስቲያን ጥንታዊት፣ ታሪካዊት በተክርስቲያን መሆኗን ገልፀው፤ ከኢትዮጵያ ሕዝብ ጋር የረጅም ጊዜ ዲፕሎማሲያዊ ግንኙነት የሩሲያ መንግሥትና የኦርቶዶክስ ቤተ ክርስቲያን እንደነበራቸው ለወደፊቱም ተጠናክሮ እንደሚቀጥል ልዩ ልዩ የሥልጠና ዕድልም እንደሚሰጥ አብራርተው ፓትርያርኩ ሩሲያን መጎብኘት የበለጠ የሚያጠናክረው ይሆናል በማለት ገልፀዋል።

ቅዱስነታቸው ከሩሲያን ፌደሬሽን ምክትል አፈ ጉባኤ ከሚስተር ኒኮላይ ፌዮዶሮብና ከምክር ቤቱ አባላት ጋር ውይይት አድርገዋል፤ አፈ ጉባኤውም የሁለቱ አብያተ ክርስቲያናት ግንኙነት ለሁለቱም ሀገራት ጠቃሚ መሆኑን ገልፀው፤ የቅዱስነታቸው ጉብኝት ታሪካዊ እንደሆነና የሕዝብ ለሕዝብ ግንኙነት መጠናከር መልካም አጋጣሚ እንደሆነ ገልፀዋል፤ ቅዱስነታቸውም በበኩላቸው፣ የዚህ ጉብኝት ዋና ዓላማም የቆየውን ግንኙነት ማጠናከር ስለ ዓለም የሰው ልጆች ደህንነት ማሳሰብና መጸለይ በልማቱም ዙሪያ ትብብር እንዲኖረን የልምድ ልውውጥ እድልም እንዲከፈት ከአሁን በፊት ተምረው የመጡ የቤተ ክርስቲያን አባቶች በከፍተኛ የቤተ ክርስቲያኒቱ የሥልጣን እርከን በማገልገል ላይ መሆናቸውን አውስተው፤ አሁንም ይህ ተግባር እንደሚቀጥል ምኞታቸውን ገልፀዋል።

በፓትርያርኩ የግራንድ ክሬሚልን ቤተ መንግሥትና ከፍተኛ የመንፈሳዊ ዩኒቨርስቲ ቲዮሎጂካል ኮሌጆች ተጎብኝተዋል።

በመጨረሻም በሩሲያ የኢትዮጵያ ባለሙሉ ሥልጣን አምባሳደርና የኤምባሲው ሠራተኞች እንዲሁም የዲያስፖራው ማኅበረሰብ የራት ግብዣ የተደረገ ሲሆን፤ ቅዱስነታቸው በግብዣው ላይ ለነበሩት ኢትዮጵያውያን፣ አሁን ሀገራችን ኢትዮጵያ እያደገች በመሆኗ፣ እናንተም ወደሀገራችሁ ተመልሳችሁ ሥራ መሥራት ይጠበቅባችኋል፤ በማለት አባታዊ ምክራቸውን ለግሰዋል። ልዑኩ በሩሲያ የነበረውን ሐዋርያዊ ጉብኝት አጠናቆ ከትናንት በስቲያ ሰኞ ጠዋት አዲስ አበባ ገብቷል።¾  

የአፄ ዮሃንስ አራተኛ ማህበር መታሰቢያ ሀውልትና ልዩ ልዩ ተያያዥነት ያላቸው ተቋማት ሊገነቡ ነው።

የአፄ ዮሃንስ አራተኛ ማህበር በመባል የሚታወቀው ማህበር ይሄንኑ ሥራ ለማከናወን ሀላፊነቱን በመውሰድ እየሰራ ሲሆን ይህንኑ ዘርፈ ብዙ መታሰቢያ የልማት ሥራ በትግራይ ክልል መቀሌ ከተማ አቅራቢያ በምትገኘው አቢይ አዲ ከተማ ለመስራት እንቅስቃሴ የተጀመረ መሆኑን የማህበሩ ሰብሳቢ አቶ መክብብ በላይ ባለፈው ዕሁድ በዚሁ ዙሪያ በተጠራው ማብሰሪያ ስብሰባ ላይ አመልክተዋል።

ይሄው የመታሰቢያ የልማት ሥራ ተንቤን አቢይ አዲ ከተማን የትግራይ ክልል የቱሪዝም ማዕከል እንድትሆን የሚያስችላት መሆኑ ተመልክቷል። አቢይ አዲ ከተማ ለዚህ ታሪካዊ ሁነት ተመራጭ ያደረጓት በርካታ ታሪካዊ ሁነቶች መኖራቸው በዕለቱ ተመልክቷል። ይሄው ፕሮጀክት በከተማዋ ሰው ሰራሽ ሀይቅን መገንባት እንደዚሁም ሙዝየምን መገንባት ጭምር የሚያካትት መሆኑ ታውቋል። ከዚህም በተጨማሪ በንጉሱ መታሰቢያነት የስነ ታሪክና ቅርስ ምርምር ማዕከል እና የባህልና ቱሪዝም ማዕከልን ለመገንባት ታቅዷል።

በቀጣይም ከዚሁ ጋር በተያያዘ ስብሰባ የሚከሄድ ሲሆን በርካታ ምሁራንና ባለሀብቶችን እንደዚሁም የተለያዩ የመንግስት ኃላፊዎችንም ለማሳተፍም እቅድ መያዙ ታውቋል።

በዚህም አንድ ራሱን የቻለ ቋሚ ፋውንዴሽን ለማቋቋም የታሰበ መሆኑን የማህበሩ ሰብሳቢ አቶ መክብብ በላይ ለተሰብሳቢው ጨምረው ገልፀዋል። ከዚሁ የአፄ ዮሃንስ መታሰቢያ ሀውልትና ሙዚየም ጋር በተያያዘ ለሚሰራው ሰፊ መዝናኛ በአቢል አዲ ከተማ 35 ሄክታር መሬት የተፈቀደ መሆኑን አቶ መክብብ ጨምረው አመልክተዋል። ይህንንም ሰፊ ፕሮጀክት እውን ለማድረግ ነሀሴ 16 ቀን 2010 ዓ.ም በአቢል አዲ ከተማ የመሰረት ድንጋይ የሚጣል መሆኑ ታውቋል። የመሰረት ድንጋይ መጣሉንም ተከትሎ በ2011 ዓ.ም ሰፊ የገቢ የማሰባሰብ ስራም የሚሰራ መሆኑ ተመልክቷል። ይህም ገቢ የማሰሰባሰብ ሂደት ዓለም አቀፍ የቴሌቶን ቀንንም ጭምር ያካትታል ተብሏል።¾

 

-    የባለሥልጣናት ቆይታ በሥራ አፈፃፀማቸው ይወሰናል፤

 

በውጭ አገራት ባንኮች አካውንት ያላቸው ባለስልጣናት በአካውንቶቻቸው ላይ ምርመራ እየተደረገ መሆኑን ጠቅላይ ሚኒስትር ዶክተር አብይ አህመድ ይፋ አደረጉ፡፡

ጠቅላይሚኒስትሩ እንዳሉት በተለይም በውጭ አገራት ባንኮች አካውንት ያላቸው ባለስልጣናት በአካውንቶቻቸው ላይ ምርመራ እየተደረገ መሆኑንና ለዚህም አገራት ትብብር እያደረጉ ነው ብለዋል፡፡

ጠቅላይ ሚኒስትር ዶክተር አብይ አህመድ ትላንት በጠቅላይ ሚኒስትር ጽህፈት ቤት የመንግስት ከፍተኛ የሥራ ኃላፊዎች ሰብስበው በስራዎቻቸውና አሰራር ዙሪያ ገለጻና ማሳሰቢያ ሰጥተዋል።

ጠቅላይ ሚኒስትሩ በዚህ መድረክ ላይ የራሳቸውን ጥናታዊ ጽሁፍ ያቀረቡ ሲሆን፤ በዚሁ ጽሁፋቸውም የአመራር ጥበብን በተመለከተ ገለጻ አድርገዋል። የህዝበ አገልጋይ ምን አይነት ሰብዕና ሊላበስ እንደሚገባና ምን አይነት አገልግሎት በምን አይነት ጊዜና ቦታ መስጠት እንዳለበትም በተለያዩ አብነቶች ማብራሪያ ሰጥተዋል።

ጠቅላይ ሚኒስትሩ በዚሁ ገለጻቸው ወቅት እንዳሉትም፤ ሳምንታዊው የካቢኔ ስብሰባ ከአርብ ወደ ቅዳሜ መለወጡንና ሚኒስትሮች አርብ በስብሰባ ስም ጊዜ ማባካን እንደሌለባቸውና መደበኛ ስራቸውን እንዲሰሩ አሳስበዋል።

አገሪቷ እያደገች መሆኑን የጠቀሱት ጠቅላይ ሚኒስትሩ፤ ኢትዮጵያ አድጋለች ከማለት ባሻገር በተጨባጭ ህዝቡ ምን ያህል ተጠቅሟል የሚለውን መፈተሽና ማረጋገጥ አለብን ሲሉም አስታውቀዋል።

እያንዳንዱ የመንግስት አመራርም አሰራሩን ግልጽና ለህዝብ የማይደበቅ ማድረግ እንደሚገባውም ዶክተር አብይ አሳስበዋል።

እያንዳንዱ ሚኒስትር ከዚህ በኋላ ለስብሰባ ሲመጣ በቂ ዝግጅት ማድረግ እንደሚገባው የተናገሩት ጠቅላይ ሚኒስትሩ፤ “ሚኒስትር ሃሳብ አመንጪ እንጂ አቃቂር አውጭ አይደለም” ሲሉም ነው አጽንኦት የሰጡት።

ከባለስልጣናት ጉዞ ጋር በተያያዘም ማብራሪያ የሰጡት ጠቅላይ ሚኒስትሩ፤ በተለይም በውጭ አገራት ባንኮች አካውንት ያላቸው ባለስልጣናት በአካውንቶቻቸው ላይ ምርመራ እየተደረገ መሆኑንና ለዚህም አገራት ትብብር እያደረጉ መሆናቸውን አስታውቀዋል።

የፌዴራል መንግስት የካቢኔ አባላት የሥራ ኃላፊነት የቆይታ ጊዜ የሚወሰነው ኃላፊዎቹ በሚኖራቸው የሥራ አፈፃፀም ምዘና መሰረት ብቻ እንደሚሆን ጠቅላይ ሚኒስትር ዶክተር አብይ አህመድ አስታውቀዋል።

ከዚህ በኋላም የህዝብ ተወካዮች ምክርቤት ልዩ ልዩ ቋሚ ኮሚቴዎች ከሚከታተሏቸው ሚኒስቴር መስሪያቤቶች ጋር የስራ ስምምነት መፈጸም እንደሚገባቸውና ስራቸውን በዚህ አግባብ እንዲሰሩ አሳስበዋል።

        

ዜና ትንታኔ

 

አቶ ካሳሁን ኃ/ማሪያም፤

ከትራንስፖርት ባለሥልጣን ዋና ዳይሬክተርነት ተነሱ

 

በትራንስፖርት ሚኒስቴር የትራንስፖርት ባለስልጣን ዋና ዳይሬክተር በመሆን ላለፉትሃያ ሁለት ዓመታት ያገለገሉት አቶ ካሳሁን ኃ/ማሪያም ከኃላፊነታቸው ተነስተዋል፡፡

ሰኞ ዕለት በጠቅላይ ሚኒስተር አብይ አሕመድ በተፃፈ ደብዳቤ ከኃላፊነት መነሳታቸው ታውቋል፡፡ በምትካቸው በትራንስፖርት ሚኒስቴር ሚኒስትር ዴኤታ የነበሩት አቶ አብዲሳ ያደታ ዝቅ ተደርገው እንዲተኳቸው ተወስኗል፡፡

ጠቅላይ ሚኒስተር አብይ አህመድ እየወሰዱት ያለው የሪፎርም እርምጃ ተገቢነቱ ጥያቄ ውስጥ የሚወድቅ አይደለም፡፡ የጀመሩት ሪፎርም መሰረታዊ ለውጥ እንዲያመጣ እና አዲስ የሚሾሙ ሰዎች ከሕግ በታች መሆናቸውን ግንዛቤ የሚወስዱበት የአሿሿም ስርዓት እየተዘረጋ መሆኑን ለማስጨበት ሁለት መሰረታዊ ነገሮች መሟላት አለበት፡፡

አንደኛው፣ አዲስ የሚሾሙ ሰዎች ቀድሞ ከነበረው ኃላፊ ወይም ባለስልጣን በትምህርት ዝግጅት ከፍ ያሉና ለሚሾምበት ኃላፊነት ተዛማጅ የሙያ ባለቤት መሆናቸው መረጋገጥ አለበት፡፡ ሁለተኛ፤ ከኃላፊነት የሚነሱ ሰዎች በሰሯቸው ጥፋቶች ልክና መጠን በሕግ የሚጠየቁበት አሰራር መዘርጋት አለበት፡፡ ይህንን ማድረግ ሲቻል አዲስ ተሻሚዎች ሥራ ከመጀመራቸው በፊት ከሕግ የበላይነት ማምለጥ እንደማይችሉ አውቀው እንዲገቡበት እድል ይፈጥራል፡፡ የሚወሰደው እርምጃም በሕግም በሕዝብ ፊት ቅቡል ይሆናል፡፡

እንደማሳያ ለማስቀመጥ፣ አቶ ካሳሁን ኃ/ማሪያም ይመሩት የነበረው የትራንስፖርት ባለስልጣን መስሪያቤት በየቀኑ በመኪና አደጋ ከሚቀጠፈው ዜጋ አንስቶ እስከ የእድገትና ትራንስፎርሜሽን እቅድ ግብዓት እስከማቅረብ የነበረው አሉታዊ ሚና በቀላል የሚተመን አይደለም፡፡

በተለይ ጠቅላይ ሚኒስትር አብይ እንዲመለከቱት የሚያስፈልገው ዋና ነጥብ በትራንስፖርቱ ዘርፍ በአንድም በሌላ መልኩ ከገዢው ፓርቲ ጋር ቁርኝት ያላቸው በትራንስፖርት ዘርፍ የተሰማሩ ድርጅቶች እና በግል የትራንስፖርት ዘርፍ ተደራጅተው ያሉ ማሕበራት መካከል ያለው ያልተመጣጠነ የገበያ ውድድር ሊታረም የሚገባው ነው፡፡ ልማታዊ መንግስት የግሉ ዘርፍ መሰማራት በማይችልበት የሚሳተፍ የገበያ ስርዓት የሚከተል እንጂ፣ በግሉ ባለሃብት ሊሸፈን በሚችል ዘርፍ ተሻሚ የገበያ ስርዓት አይከተልም፡፡ በዚህ ዘርፍ ከገበያው ውድድር በባሰ የትራንስፖርት ባለስልጣን መስሪያቤት በገነገነ ኔትዎርክ በመያዙ የሚያስከትለው አሉታዊ ጉዳት በጊዜም በገንዘብም የሚተመን አይደለም፡፡

በአስረጂነት ለማሳየት በሰንደቅ ጋዜጣ በተደጋጋሚ ያሰፈርነውን የግሉ የትራንስፖርት ማሕበራት ተወዳዳሪ እንዳይሆኑ የተፈጸመውን የአሰራርና ግድፈቶች በዚህ መልኩ ማቅረብ ተገቢ ነው የሚሆነው፡፡

የትራንስፖርት ማኅበራት ተወዳዳሪ እንዳይሆኑ የገጠማቸው ተግዳሮቶች ምን ይመስላሉ?

 

1.የፍ/ብ/ሕግ ድንጋጌዎች ተጥሰው ህጋዊ ማኅበራት እንዲፈርሱ ተደርገዋል፣

በህግ አግባብ የተቋቋሙት ማኅበራት ህጉ በሚፈቅደው መሠረት ሊፈርሱ ይችላሉ። የፌዴራል ትራንስፖርት ባለሥልጣን መ/ቤት ግን የፍ/ብ/የሕግ ድንጋጌዎችን በመመሪያ በመሻርና ማኅበራት የሚፈርሱበት የህግ አግባብ በመጣስ ማኅበራትን አፍርሷል። ማሕበራት በሕግ የሚፈርሱበት አግባብ፣ በማኅበሩ የመመስረቻ ፅሁፍና የመተዳደሪያ ደንብ መሠረት (ፍ/ብ/ህ/ቁ454)፤ በማኅበሩ ጠቅላላ ጉባኤ ውሣኔ (ፍ/ብ/ቁ460)፤ በፍርድ ቤት ውሣኔ (ፍ/ብ/ቁ461)፤ የማኅበሩ ዓላማና ክንውኑ ህገወጥ ወይም ለመልካም ፀባይ ተቃራኒ የሆነ እንደሆነ በአስተዳደር ውሣኔ (ፍ/ብ/ቁ462) ብቻ መሆኑ በፍ/ብ/ሕጉ በግልፅና በማያሻማ ሁኔታ ተደንግጎ እያለ፤ የባለሥልጣኑ መ/ቤት ግን ቁጥራቸው ከ80 በላይ የሆኑ በህግ አግባብ የተቋቋሙ ማኅበራት በአደረጃጀት ሰበብ እንዲፈርሱና ህልውናቸውን እንዲያጡ አድርጓል።

 

2.     የማኅበራት ሃብትና ንብረት እንዲመዘበርና እንዲባክን ተደርጓል፣

የባለሥልጣኑ መ/ቤት በህግ በተሰጠው ኃላፊነት መሠረት የማኅበራት ሃብትና ንብረት ተገቢ ጥበቃ እንዲደረግለት የሚያስችል የአፈፃፀም መመሪያ ማውጣትና መተግበር ሲገባው፣ በአንፃሩ ህጋዊ ሰውነትና ህልውና ያላቸውን ማኅበራት ከህግ አግባብ ውጭ እንዲፈርሱና ህልውናቸውን እንዲያጡ በማድረግ ሃብትና ንብረታቸው ለብክነትና ለምዝበራ እንዲጋለጥ አድርጓል።

ማኅበራት የአደረጃጀት ለውጥ ያድርጉ ቢባል እንኳን በቅድሚያ ሃብትና ንብረታቸው እንደዳይባክንና እንዳይመዘበር የሚያደርግ የአፈፃፀም እርምጃዎችን ማስቀደም ሲገባውና ሐብትና ንብረቱ የፍ/ብ/ሕጉ በሚያዘው መሠረት አዲስ ወደተደራጁት ማኅበራት እንዲተላለፍ ማድረግ ሲገባው፤ ሃብቱና ንብረቱ የደረሰበት እንዳይታወቅ በማድረግ ለተፈፀመው ጥፋት ሊጠየቅበት የሚገባ ጉዳይ ነው።

 

3.     የሎጅስቲክስ አስተባባሪ ባለመኖሩ በማኅበራት ላይ የሚደርስ ጉዳትን በተመለከተ፣

በሃገራችን የሎጅስቲክስ አስተባባሪ ማዕከል የለም። ይህም በመሆኑ ወደ አገር ውስጥ የሚገቡ ግዙፍ ጭነቶች፣ ማዳበሪያ፣ የምግብ ስንዴ፣ የኮንስትራክሽን ብረቶች፣ ኮንቴነሮች….ወዘተ በጊዜ ሠሌዳ ተቀናብረው ወደብ እንዲደርሱ ስለማይደረግ፤ የትራንስፖርት አቅርቦቱ ከአቅም በላይ እንዲሆንና ወደብ ላይ ከፍተኛ ክምችት እንዲፈጠር ይደረጋል። በዚህ ጊዜ የትራንስፖርት ባለሥልጣን የትራንስፖርት ቅንጅቱን ለማስተባበር ሲል በትራንስፖርት ማኅበራት ላይ አላስፈላጊ ወከባና ጫና ይፈጥርባቸዋል፡፡ ይህም ሲባል ማኅበራት ካላቸው የጭነት ተሽከርካሪ ኃይል በላይ የጭነት ኮታ እየመደበና ማኅበራቱ ኮታውን ማንሳት በማይችሉበት ጊዜ ማኅበራቱን ከሥራና ከአገልግሎት እስከማገድ ይደርሳል።

ከዚህም በተጨማሪ የጭነት ተሸከርካሪዎችን ለመቆጣጠር በሚል ሰበብ ጋላፊና ደወሌ ላይ የመቆጣጠሪያ ኬላ በማቋቋም፤ የገቢና የወጪ ተሸከርካሪ ሹፌሮች ለኪራይ ሰብሳቢነት እንዲጋለጡ ዳርጓናል።

 

 

4.     የህገወጥ ማኅበራት እንቅስቃሴ ባለመቆጣጠር የሚፈፀሙ ህገወጥ ድርጊቶች፣

አዋጅ መሠረት የተደራጁ ብዙ ህጋዊ ማኅበራት እንዳሉ ሁሉ፤ ህጋዊ መስፈርቶችን ሳያሟሉ በየስርቻው የተቋቋሙ “የትራንስፖርት ማኅበራት” ተብዬዎች እንደ አሸን ፈልተዋል። እነዚህ “ማኅበራት” በህጋዊነት መስመር ስለማይመሩ በተለያዩ የድለላ የግንኙነት መስመሮች ጭነቶችን በከፍተኛ ዋጋ እየወሰዱና በህጋዊ ማኅበራት ውስጥ የተደራጁትን የጭነት ተሽከርካሪዎችን በደላላ እያግባቡ ዋጋ በመቀነስ ጭነቶችን ያጓጉዛሉ። በዚህም ከፍተኛ ጥቅም ያጋብሳሉ።

የትራንስፖርት ዋጋን የሚያንሩ እነዚህ ህገወጥ ማኅበራት መሆናቸው ሳይታወቅ ህጋዊ ትራንስፖርተሮች የማጓጓዣ ዋጋውን በማናር ይፈረጃሉ። የባለሥልጣኑ መ/ቤት እነዚህን ህገወጦች እንዲቆጣጠር በህጋዊ የትራንስፖርት ማኀበራት ለሚቀርብለት ማሳሰቢያ ጆሮ አይሰጥም።

 

 

5.የሞዴል የመተዳደሪያ ደንብ ትርጓሜ

በአዋጁ 468/1997 አንቀጽ 13 ስለማኅበራት መቋቋም በተደነገገው ቁጥር 5 ላይ፣ “ ባለሥልጣኑ የማኅበራት ሞዴል የመተዳደሪያ ደንብ ያወጣል” የሚል ሰፍሯል። ይህን የድንጋጌ አግባብ ከህግ አውጭው ፍላጎት ውጭ በመተርጎም፣ “ማኅበራት እንደጥንካሬያችን እና እንደተጨባጭ ሁኔታዎች የራሳችንን የመተዳደሪያ ደንብ እንዳናወጣ ገደብ አስቀምጠው፤ ሁሉም ማኀበራት በባለሥልጣኑ መ/ቤት በሚወጣ ሞዴል የመተዳደሪያ ደንብ አንድ ወጥ በሆነ መልኩ እንድንገዛ የሚያደርግ መመሪያ ቁጥር 1/2006 በጥቅምት 2006 ዓ/ም አውጥቷል።”

ይህም በመሆኑ የማኅበራትን የፈጠራ ችሎታና የውድድር መንፈስ የሚያቀጭጭ ከመሆኑም በላይ ሞዴል የመተዳደሪያ ደንቡ፣ ማኅበራት የሚተዳደሩበት የራሳቸው የመተዳደሪያ ደንብ እንዳይኖራቸው፤ ከሦስተኛ ወገን ጋር ያላቸውን ግንኙነት በራሳቸው ፍላጎት እንዳያራምዱ፤ ሃብትና ንብረት የማፍራት እንቅስቃሴያቸው በባለሥልጣኑ መ/ቤት ይሁንታ ብቻ እንዲፈፀም እና የውስጥ አደረጃጀታቸውና አመራራቸው በነፃነት እንዳያራምዱ ተግዳሮት እንደፈጠረባቸው አስታውቀዋል።

 

 

6.የትራንስፖርት ኦፕሬተር የደረጃ አሰጣጥ መሥፈርትና የሙያ ብቃት ማረጋገጫ የአፈፃፀም መመሪያ ቁጥር 1/ 2006 በማኅበራት ህልውናና እድገት ላይ ያስከተለው ችግር

የትራንስፖርት ባለሥልጣን በጥቅምት 2006 ዓ.ም “….የድንበር ተሻጋሪ የጭነት ትራንስፖርት ኦፕሬተር የደረጃ አሰጣጥ መሥፈርት የሙያ ብቃት ማረጋጫ የአፈፃፀም መመሪያ ቁጥር 1/2006 “በሚል ስያሜ አንድ መመሪያ አውጥቷል።ህ መመሪያ ዓላማ አድርጎ የተነሳው ድንበር ተሻጋሪ የጭነት ትራንስፖርት ዘርፍን ለማዘመን ነው ቢባልም በተግባራዊ የአፈፃፀም ውጤቱ ግን አዋጁን በመመሪያ በመሻር በርካታ ችግሮችን አስከትሏል።

በተግባር ከተከሰቱት ችግሮች መካከል፣ በደረጃ መሥፈርቱ መመሪያ መሠረት ተሸከርካሪዎች የተሰሩበት ዘመንና እድሜያቸውን በዋና መሥፈርትነት በመጠቀም ከ1 እስከ 10 ዓመት እድሜ ያላቸው በደረጃ 1፤ ከ10 እስከ 20 ዓመት እድሜ ያላቸው በደረጃ 2፤ ከ20 ዓመት በላይ እድሜ ያላቸው በደረጃ 3 እንዲደራጁ ከመደረጉም በላይ በእያንዳንዱ ደረጃ የእድሜ መሥፈርት የሚካተቱ ተሽከርካሪዎች እንደገና በመጫን አቅማቸው በመለየት ከ300 ኩ/ል በላይ የመጫን አቅም ያላቸው በ“ሀ” እንዲሁም እስክ 299.9 ኩ/ል የመጫን አቅም ያላቸው በ“ለ” እንዲመደቡ ይደረጋል።

ይህ አደረጃጀት፡- ተሽከርካሪዎቹ በደረጃው የእድሜ ጣሪያ ላይ ሲደርሱ ከነበሩበት ማኅበር ደረጃ ወደ ቀጣዩ የማኅበር ደረጃ እንዲሸጋገሩ ይገደዳሉ። ተሽከርካሪዎቹ በየጊዜው ከማኅበር ወደ ማኅበር እንዲፈናቀሉ በሚደረግበት ጊዜ የተሽከርካሪው ባለንብረት ለዓመታት በነበረበት ማኅበር የአባልነት ቆይታው ወቅት ለማኅበሩ ያስገኘው የገንዘብ፣ የሚንቀሳቀስና የማይንቀሳቀስ የሃብትና የንብረት እሴቶችን ጥሎ እንዲሄድ ይገደዳል።

ሌላው፣ የማኅበራት ሃብትና ንብረት ባለቤትና ተቆጣጣሪ እንዳይኖረው፣ እንዲባክንና ለግል ጥቅም እንዲውል የሚያደርግ አሠራር ከመሆኑም በላይ የተሸከርካሪ ባለንብረቶች ገንዘብና አቅማቸውን አስተባብረው ወደ ላቀ ተቋማዊ የትራንስፖርት የእድገት ደረጃ አደረጃጀት ለመሸጋገር የሚዲርጉትን ጥረት የሚያመክን እጅግ ከፍተኛ ጎጂ የሆነ አሠራር ነው።

እንዲሁም ማኅበራት ይህ ለትራንስፖርት ዘርፉ እድገት ጎጂ የሆነውን የአደረጃጀት ሥርዓት ተጠንቶና ጉዳቱ ታውቆ አፋጣኝ የእርምትና የማስተካከያ እርምጃ እንዲወሰድ ለባለሥልጣኑ መ/ቤት ማሳሰቢያ ቢያቀርቡም የባለሥልጣኑ መ/ቤት ማሳሰቢያውን ካለመቀበሉም በላይ አማራጭ የማሻሻያና የማስተካከያ አደረጃጀት ለማቅረብ አልቻለም።

በመሆኑም ማኅበራት በአሁኑ ጊዜ ከተጋረጠባቸው የጥፋት መንገድ ለመላቀቅ የሚያስችላቸው በጋራና በአንድነት ተደራጅተው ህጋዊና ሠላማዊ እንቅስቃሴ ለማድረግ አማራጭ አካሄዶችን ለመከተል ተገደዋል።

ከመነሻው መመሪያው በአዋጁ 468/1997 አንቀጽ 12 ተራ ቁጥር 2 “..በህዝብ የንግድ የመንገድ ማመላሻ ሥራ ላይ ሰዎችና ድርጅቶች በአዋጁ አንቀጽ 13 መሠረት የሚቋቋም ማኅበር አባል በመሆን ወይም የማኅበር አባል ሳይሆኑ ሥራቸውን በግል ሊያካሂዱ ይችላሉ..” የተሰኘውን ድንጋጌ ይሽራል። በመመሪያው መሠረት እያንዳንዱ የጭነት ተሽከርካሪ የማኅበር አባል የመሆን ግዴታ ተጥሎበታል።

በአዋጁ አንቀጽ 13 ተራ ቁጥር 4 “….በህዝብ የንግድ የመንገድ ማመላለሻ ሥራ ላይ የተሰማራ ማንኛውም ሰው ወይም ድርጅት በአንድ ጊዜ በአንድ የስምሪት መስመር   ውስጥ ከአንድ በላይ በሆኑ ማኅበራት ውስጥ አባል ሊሆን አይችልም….” የሚለው የአዋጅ ድንጋጌ በመመሪያ ተሸሮ ሁለትና ከዚያ በላይ የጭነት ተሽከርካሪ ባለንብረት የሆነ “ሰው“ በሁለትና ከዚያ በላይ በሆኑ ድንበር ተሻጋሪ ማኅበራት ውስጥ እንዲደራጅ ተገዷል። በመሆኑም መመሪያው ባለንብረቱ የጭነት ተሽከርካሪዎቹን በአንድ ዕዝ ሥር ለመቆጣጠር ያለውን ህጋዊ ችሎታ ነፍጎታል።

ከላይ ለማሳያ አስቀመጥነው እንጂ፣ በአስር ሺ ተሽከርካሪ የሰው ሞት እንደሚሰላ የሚገነዘበው የትራንስፖርት ባለስልጣን በመኪና አደጋ የሚሞተውን የሰው መጠን በተዛባ ሁኔታ እንደሚያቀርብ ይታወቃል፡፡ ይኸውም፣ 750ሺ ተሽከርካሪ መኖሩ ቢነገርም፣ ከዚህ ውስጥ ምን ያሉ መኪና ምን ያህሉ ተሳቢ መሆኑ በግልፅ አይቀመጥም፡፡ ተሽከርካሪ ሲባል ሞተር ያለው ተንቀሳቃሽ ማለት ነው፡፡ ባለስልጣን መስሪያቤቱ ግን ተሽከርካሪ የሚቆጥረው ተሳቢውን ደምሮ ነው፡፡ ስለዚህም በአስር ሺ መኪና የሚለካው የሰው ሞት፣ ትክክለኛ አሃዙን አያሳይም፡፡

የተደረገው ለውጥ ከአናት መምጣቱ አንድ ነገር ሆኖ፣ በትራንስፖርት መስሪያቤት ያለውን የተበላሸ ኔተዎርክ መበጠስ ካልተቻለ ለውጥ መጠቀብ አይቻለም፡፡ ከዳሬክተሮቹ ጀምሮ መበወዝና ማስተካከል ቀጣይ ስራ መሆን አለበት፡፡

 

 

 

የመንግሥት መገናኛ ብዙሃን መቀመጫውን በውጭ አገር ካደረገው የኦሮሞ ዴሞክራቲክ ግንባር (ኦዴግ)ጋር ድርድር መጀመሩን ይፋ አድርጓል፡፡

 

ኦዴግም ከዋሽንግተን ዲሲ ባወጣው መግለጫ ከኢትዮጽ ምንግሥት ልዑካን ቡድን ጋር ከግንቦት 3 አስከ 4 ቀን 2010 ዓ.ም እየታዩ በመጡ ለውቶች ዙሪያ ውይይት ማካሄዱን አስታውሶ እንዚህ የማሻሻያ እርምጃዎች እንዲሰፉ፣ እንዲጎለብቱና ጥልቀት እንዲኖራቸው ያለውን ፍላጎት ገልጿል፡፡ ገና ብዙ የሚቀረው ቢሆንም ኢትዮጵያ መንግሥት እየወሰደ ባለው የለውጥ እርምጃዎች ኦዴግ መበረታታቱን መግለጫው ይጠቅሳል፡፡ ኦዴግ የተጀመሩትን የማሻሻያና የለውጥ እርምጃዎች እንዲጎለብቱ ለማስቻል የሚጠበቅበትን ሚና ለመጫወት ዝግጁ መሆኑን አብስሮ ውይይቱን ለመቋጨት አንድ የኦዴግ ከፍተኛ የልዑካን ቡድን በቅርቡ ወደአገር ቤት እንደሚልክ አስታውቋል፡፡


የመንግስት ኮሙዩኒኬሽን ጉዳዮች ጽህፈት ቤት ሰሞኑን ባወጣው መግለጫ፥ የኢፌዴሪ መንግስት የሃገሪቱን ሠላምና መረጋጋት ለማረጋገጥ ያላሰለሰ ጥረትና ተግባራዊ እንቅስቃሴ በማድረግ ላይ መሆኑን ጠቅሷል።


የሃገሪቱን ህገ መንግስት ተቀብለው በሰላማዊ መንገድ ከሚታገሉ የፖለቲካ ፓርቲዎች ጋር ለመደራደር ዝግጁ መሆኑን በገለጸው መሰረት፥ ለተፎካካሪ የፖለቲካ ፓርቲዎች የሠላም ጥሪ ማስተላለፉን አስታውሷል።


በዚህም የመንግስት ከፍተኛ አመራሮች መቀመጫውን ከሃገር ውጭ ካደረገውና የኦሮሞ ዴሞክራቲክ ግንባር (ኦዴግ) ተብሎ ከሚጠራው ድርጅት ጋር ድርድር አድርገዋል ብሏል መግለጫው።


ግንባሩም ከመንግስት የቀረበለትን ጥሪ አክብሮ በሰላማዊ መንገድ የፖለቲካ እንቅስቃሴ ለማድረግ መወሰኑን መንግስት በአድናቆት ይመለከተዋል ብሏል፡፡


ከግንባሩ ጋር የተደረገው ድርድር የተሳካና ሃገራዊ መግባባት የሰፈነበት እንደነበር ያነሳው መግለጫው፥ በሰለጠነ መንገድ የሚደረግ ውይይትና ድርድርን መንግስት በሰላማዊ መንገድ ከሚታገሉ አካላት ጋር በቀጣይም አጠናክሮ እንደሚቀጥል ገልጿል።


መግለጫው የግንባሩ አመራሮች በቅርብ ቀናት ውስጥ አዲስ አበባ እንደሚገቡ ጠቅሶ፥ ቀሪ ድርድሮችም አዲስ አበባ እንደሚደረጉ ይጠበቃል ብሏል።


መንግስት ወደፊትም ህገ መንግስቱን ባከበረና ሰላማዊ በሆነ መንገድ በሃገራቸው የፖለቲካ እንቅስቃሴ ውስጥ መሳተፍ ከሚፈልጉ አካላት ጋር ለመወያየትና ለመደራደር ዝግጁ መሆኑንም መግለጫው አንስቷል፡፡

 

በድርድሩ ዙሪያ የተሰጡ አስተያየቶች

 

የአዴግ ወደ ኢትዮጵያ መግባት ከተሰማ በኋላ በድጋፍም ሆነ በተቃውሞ የተለያዩ አስተያየቶች እየተንጸባረቁ ነው፡፡ ባለቅኔው ፕሮፌሰር ፍቅሬ ቶሎሳ ፈጠን ብለው ቁጣቸውን ከገለጹ ኢትዮጵያውያን አንዱ ናቸው፡፡ በፌስ ቡክ ገጻቸው እንዲህ ብለዋል፡፡


"የኦሮሞ ዲሞክራቲክ ግንባር የሚባለው "ድርጅት" ከቀድሞው የኦሮሞ ነፃ አውጪ ግንባር ተገንጥሎ የወጣ ነው። በአመራሩ ውስጥ ያሉት ግለሰቦች ዋናዋናዎቹ ግማሽ ደርዘን ወይም ከዛ በላይ የሚቆጠሩ ሲሆኑ በቀድሞው የኦነግ አመራር ውስጥ የነበሩ ናቸው። ከእነሱም ውስጥ እንደ እነ አቶ ሌንጮ ለታ፥ዶክተሮቹ ዲማ ነገዎ እና በያን አሶባ ይገኙባቸዋል።


እነዚህ በሽምግልናቸው ዘመን የአሉ ግለሰቦች ኦነግን ወክለው ከኢህአዴግ ጋር አብረው ለአጭር ጊዜ የመንግሥት አካልና አምሳል ሆነው በኢህአዴግ እስከተባረሩ ድረስ ኢትዮጵያ ውስጥ ባለስልጣናት ሆነው መቆየታቸው ይታወሳል። ከ17000 የሚበልጡ የኦነግ ጦረኞችን ኢህአዴግ ትጥቃቸውን አስፈትቶ አስሮ ደብዛቸው በጠፋበት ሁኔታ እነዚህ መሪዎች እግሬ አውጭኝ ብለው የራሳቸውን ነፍስ ብቻ ማትረፋቸውም ከቶውንም አይረሳም። በእዚህ ሁሉ ሳቢያ የኦነግ አባላት ናችሁ እየተባሉ የኦሮሞ ወጣቶች ሁሉ እየተሰቃዩ እስከአሁንም ድረስ እስር ቤታቹን እንደአጣበቡት የታወቀ ነው።


በእዚህ ላይ ደግሞ በበደኖ፣ አርሲ፣ አርባጉጉ፣ አሶሳ እና በሌሎችም ቦታዎች በግፍ ለተገደሉት አማሮች እነዚህን የቀድሞ ኦነግ መሪዎች በሀላፊነት እንጠይቃለን የሚሉ ፍትህ የሚሹ ሰዎች አሉ።


እነዚሁ ግለሰቦች ከግንቦት 7ት ጋር ግንባር ፈጥረው ወዲያ ወዲህ እየተንሸራሸሩ በኢሳትም ሬድዮ እና ቲቪ ሲገለገሉበት ከርመዋል። አሁን እንደምንሰማው ደግሞ ግንቦት ሰባትን ሸውደው ለብቻቸው በሚስጥር ከኢህአዴግ ጋራ ተስማምተው ከተባረሩ ከ20 ምናምን ዓመታት በኋላ ወደ ኢትዮጵያ ሊገቡ ነው።


ወደ ፍሬነገሬ ልግባና አሁን እነዚህ ጥቂት ግለሰቦች የሚደራደሩበት የጦር ሰራዊት እና ከቁጥር የሚገቡ አባላት በውጭ ሀገርና ኢትዮጵያ ውስጥ ሳይኖራቸው መንግሥት እነሱን ኑ እና አብረን እንሥራ የሚላቸው በምን ሂሳብ ይሆን? ኢትዮጵያ ገብተውስ በባዶ እጃቸው ምን ተግባር ሊፈጽሙ ይችላሉ? አላማቸው አዳዲስ አባላትን ለማሰባሰብ ከሆነ የኦሮሞ ቄሮ ኦሆዴድን በደገፈበት ሰዐት እነሱ አዲስ አባለትን ምን ብለው አሳምነው ሊመለምሉ ነው? እነሱ ኢትዮጵያ ቢገቡ ስልጣን ላይ ያለው መንግሥት ምን ይጠቀማል? እውጭ ሀገር ቢቀሩስ ምን ይጎዳል?" ሲሉ ውሳኔውን ነቅፈዋል፡፡


አንዳንዶች የኦዴግ ውሳኔና ፈር ቀዳጅ ለመሆን የወሰደው እርምጃ ለኢትዮጵያ የፖለቲካ ምህዳር መስፋት አዎንታዊ ሚና ይኖረዋል የሚል ተስፋን ሰንቀዋል፡፡

Page 1 of 107

Sendek Newspaper

Bole sub city behind Atlas hotel

Contact us