የኖክ የ250 ሚሊዮን ብር ኢንቨስትመንት

Wednesday, 22 November 2017 12:18

 

ናሽናል ኦይል ኢትዮጵያ (ኖክ) እ.ኤ.አ 2004 ዓ.ም ከተመሰረተ ጀምሮ ከአውሮፕላን ነዳጅ ጋር በተያያዘ በአጠቃላይ የ250 ሚሊየን ብር ኢንቨስትመንት በማድረግ የኢትጵያ አየር መንገድን የነዳጅ ፍጆታ 50 በመቶ ድርሻ ለመውሰድ መብቃቱን ገለፀ።

 

ይህ የተገለፀው የኩባንያው የአቪዬሽን ዴፖ ማስፋፊ ያግንባታን እና ዘመናዊ የወቅቱን ከፍተኛ ቴክኖሎጂ በመጠቀም የተፈበረኩትን የአይሮፕላን ነዳጅ መሙያ ሪፊዩለሮች አቀባበል አስመልክቶ ባለፈው ሳምንት በቦሌ ዓለም አቀፍ አውሮፕላን ጣቢያ በተዘጋጀ ሥነ-ሥርዓት ላይ ነው።


የአየር መንገዱን ዕድገት አስከትሎ የኩባንያውን የቦሌ ዲፖ መሰረተ ልማት ማሳደጉ ግድ ሆኖ መገኘቱ ስለታመነበት ለአይሮፕላን ነዳጅ መሙያ ሪፊዩለሮች ግዢ እና የዴፖውን ነዳጅ ማከማቻ የማራገፊያና የመጫኛ መሰረተ ልማት ማስፋፋት ስራ እንዲከናወን የኩባንያው የቦርድ ሊቀመንበር የክብር ዶ/ር ሼክ መሐመድ ሁሴን ዓሊ አል-አሙዲ በድምሩ ብር 119 ሚለዮን በጀት ፈቅደዋል።


የማዕድን፣ ነዳጅና ተፈጥሮ ጋዝ ሚኒስትር ዴኤታ ዶ/ር ኳንግቱትላም፣ በወቅቱ እንደተናገሩት የሀገሪቱ የአቪዬሽን ኢንዱስትሪ ከአገሪቱ አጠቃላይ እድገት ጋር ተያይዞ እያደገ ነው። ከዚህ አንፃር ኖክ በነዳጅ አቅርቦትና በአጠቃላይ ለዘርፉ እድገት እያደረገ ያለው አስተዋፅኦ የሚበረታታ ነው ብለዋል።


የኖክ ዋና ሥራ አስፈፃሚ አቶ ታደሰ ጥላሁን እንደገለፁት ኩባንያው ነዳጅና የነዳጅ ውጤቶች ሥርጭት ሥራ ከጀመረ አስራ ሶስት ዓመትን አስቆጥሯል። በአሁኑ ሰዓትም በ180 ማደያዎች የነዳጅ ሥርጭት ሥራው በመላው ኢትዮጵያ በተቀላጠፈ ሁኔታ ተደራሽነቱ እንዲጨምር በማድረግ የገበያ መሪነቱን ተጎናጽፏል።


በቀጥታ ደንበኞችም በአገሪቱ እየተካሄድ ባሉ ትላልቅ ፕሮጀክቶች የህዳሴ ግድብን ጨምሮ ዋነኛ የነዳጅ አቅራቢ በመሆን ለዕድገትና ትራንስፎሜሽን እቅዱ መሳካት በኩሉን ድርሻ እየተወጣ ይገኛል።


የአቪዬሽን ኢንዱስትሪው በዓለም አቀፍ ደረጃ በተለይም በታዳጊ አገሮች ከፍተኛ እድገት እያስመዘገበ ይገኛል። የዓለም አቀፍ ሲቪልአቪዬሽንስ ድርጅት መረጃዎች እንደሚጠቁሙት እ.ኤ.አ በ2016 ወደ 3 ነጥብ 7 ቢሊየን መንገደኞች የተስተናገዱ ሲሆን ይህ አኃዝ ከ15 ዓመት በኋላ ከእጥፍ በላይ እንደሚያድግ ይጠበቃል።


በዓለም ከፍተኛውን የመንገደኞች ትራፊክ በማስተናገድ አትላንታ.፣ ቤጅንግና ለንደን 95 ሚሊየን፣ 82 ሚሊየን እና 70 ሚሊየን መንገደኞችን በማስተናገድ በቅደም ተከተል ይጠቀሳሉ።


በአፍሪካ ደረጃ ሲታይ ደግሞ ጆሀንስበርግ (O. R. Tambo International) ካይሮ (Cairo) እና ኬፖታውን (Cape Town) 20 ነጥብ 7 ሚሊዮን፣ 16 ነጥብ 5 ሚሊየን እና 10 ሚሊየን መንገደኞችን በማስተናገድ ከ1ኛ እስከ 3ኛ በደረጃ ይከታተላሉ። የአዲስ አበባ ቦሌ ኤርፖርትም 8 ነጥብ 7 ሚሊዮን መንገደኞች በማጓጓዝ በ4ኛ ደረጃ ይገኛል። ወደፊትም በአጭር ጊዜ ከላይ የተጠቀሱት የአፍሪካ ኤርፖርቶች ደረጃ ይደርሳል ወይንም ይበልጣል ተብሎ እንደሚጠበቅ አቶ ታደሰ ጠቁመዋል።


በዓለማች በአሁኑ ጊዜ የቀኑ የሁሉም የነዳጅ ፍጆታ 14 ሚሊየን MC እንደሆነ ይገመታል። ከዚህም ለትራንስፖርት 8 ሚሊየን MC በቀን ሲገመት ለአቪየሽን ትራንስፖርት ደግሞ የሚውለው 1 ሚሊየን MC ነው። የአፍሪካ አቪዬሽን ነዳጅ በቀን 31 ሺህ 800 MC ሲገመት ከዚህ ውስጥ የኢትዮጵያ ድርሻ በቀን 2 ሺህ 200 MC ይሆናል።


ባለፉት አስርት አመታት የአቪዬሽን ነዳጅ ፍጆታ በአለም አቀፍ ደረጃ በአማካይ በዓመት 1 በመቶ ሲያድግ በታዳጊ አገሮች ግን በአማካይ በ5 በመቶ አድጓል። ከፍተኛ እድገት ካሳዩት ውስጥ ቻይናና ሕንድ የሚጠቀሱ ናቸው።


የኢትዮጵያ የጄት ፊዩል ፍጆታ ከነበረበት በጣም አነስተኛ ደረጃ ባለፉት አስር ዓመታት ውስጥ ከሶስት እጥፍ አካባቢ አድጓል። እ.ኤ.አ በ2004 የነበረው ፍጆታ 128,000 MC በአመት ሲሆን፣ በ2016 (እ.ኤ.አ.) 687,000 MC ደርሷል። በሚቀጥሉት አስር አመታትም ይህ አሃዝ እንደዚሁ በሶስት እጥፍ በላይ እንደሚያድግ ይገመታል።


ኖክ አቪዬሽንም ይህን ፈጣን እድገት በመገንዘብ በሰባት ዓመት ጊዜ ውስጥ በተከታታይ እድገት በማሳየት ከ15 በመቶ፣ 21 በመቶ፣ 29 በመቶ፣ 31 በመቶ እና 38 በመቶ የገበያውን ድርሻ በመውሰድ በእ.ኤ.አ 2017 ብቻ 254 ሚሊየን ሊትር ለአውሮ ፕላኖች ነዳጅ አቅርቧል።


የአዲስ አበባ ኤርፖርትን የምስራቅ አፍሪካ ሀብ ለማድረግ በሚደረገው ጥረት ናሽናል ኦይል ኢትዮጵያ በተከታታይ ኢንቨስት በማድረግ የሚጠበቅበትን አገልግሎት የአለም አቀፍ ደረጃውን በጠበቀ መልኩ ለሟሟላት ከመቼውም በላይ በትጋት እየሰራ ይገኛል።


የነዳጁን ጥራት ለማስጠበቅ ኩባንያው በዓይነቱ ልዩ የሆነ ዘመናዊ የኤሌክትሮኒክ መሣሪያና የመቆጣጠሪያ ሲስተም በቅድሚያ የአይሮፕላን ነዳጅ በተወሰኑ አመላላሽ ቦቴዎች ላይ በሥራ ላይ አውሏል። ይህ ዘመናዊ የኤሌክትሮኒክ መሣሪያና የመቆጣጠሪያ ሲስተም ነዳጅ አመላላሽ ቦቴዎች ላይ ማናቸውንም ህገወጥ የነዳጅ ማቀናነስም ሆነ የመቀየጥ ተግባር በሚፈፀምበት ወቅት ወዲያወኑ ወደ ተመረጡ የመከታተያና የመቆጣጠሪያ ጣቢያዎች በአንድ ጊዜ ሪፖርት በማሰራጨት አስፈላጊና ህጋዊ እርምጃዎች በአጥፊዎች ላይ እንዲወሰድ የሚያስችል መሳሪያ ነው።


ይህን ሲስተም በመጀመሪያ ደረጃ በአይሮፕላን ነዳጅ አመላላሽ ተሸከርካሪዎች ላይ እንዲጀመር ያስፈለገበት ዋና ምክንያት የአየር ትርንስፖርት ዘርፍ በአንፃራዊነት ከሌሎቹ በተለየ ሁኔታ ዓለም አቀፍ የደህንነት ህግጋትንና የአሰራርን ደረጃን የሚጠይቅ በመሆኑ ይህንኑ ለማስፈፀም በእጅጉ እንደሚረዳ በመታመኑ ነው። አስካሁን ባለው አፈፃፃም ውጤቱም እጅግ አመርቂ ሆኖ ተገኝቷል።


አዲስ የተገዙት ሪፊዩለሮች እያንዳንዳቸው 44 ሺህ ሊትር የመያዝ አቅም ያላቸውና እንዲሁም በደቂቃ እስከ 2 ሺህ 200 ሊትር ድረስ የመሙላት አቅም ያላቸው ሲሆኑ፣ የነዳጁን ጥራት በከፍተኛ ደረጃ ለመጠበቅ የሚያስችል ማጣሪያ (Filtration System) እና የናሙና መፈተሻ ተገጥሞላቸዋል። አስፈላጊ ሆኖ ሲገኝ የዲፊውሊንግ (Defueling) ሥራም እንዲያከናውኑ ተገቢው መሣሪያ የተገጠመላቸው ናቸው።


እንደ አቶ ጥላሁን ገለፃ ከሆነ እያንዳንዱ ሪፊዩለር የአይሮፕላን ነዳጅ መሙያ የየራሳቸው ሊፍት (Elevating Plat form) ያላቸው ሲሆን አየር መንገዱ የሚያስመጣቸውን እጅግ ዘመናዊ አይሮፕላኖች ጭምር ለመሙላት እንዲችሉ የዘመኑን ቴክኖሎጂ በመጠቀም የተፈበረኩ ናቸው። በዚህም ሂደት 44ሺ ሊትር ለመውሰድ የሚለውን የአይሮፕላን በ20 ደቂቃ ማስተናገድ እንችላለን።


የነዚህ ዘመናዊ መሳሪያዎች ወደ ኖክ አቪዬሽን ዴፖ መካተት የኖክን የአይሮፕላን ነዳጅ የመሙላት አቅም በከፍተኛ ደረጃ በማሳደግ የአየር መንገዱን ፍጆታ 50 በመቶ ድረስ ለመሙላት በሚያስችለቸው ሁኔታ ላይ ያደርሱታል።
እያንዳንዱ ሪፊዩለር የ20 ሚሊዮን ብር ዋጋ ሲኖረው ሁለቱ ሪፊዩለሮች በአጠቃላይ 40 ሚሊዮን ብር ወጪ ተደርጎባቸዋል። ይህም እስከ አሁን ድረስ በአቪዬሽን ሥራ ላይ የተደረገውን የኢንቨስትመንት መጠን ወደ 250 ሚሊየን ብር ያደርሰዋል።


በአጠቃላይ የኖክ ኢንቨስትመንት በኢንዱስትሪው ውስጥ የአንበሳውን ድርሻ በመውሰድ 2 ቢሊየን ብር ሲሆን የድርጅቱ ጠቅላላ ንብረት 5 ነጥብ 5 ቢሊየን ደርሷል። 

ይምረጡ
(0 ሰዎች መርጠዋል)
63 ጊዜ ተነበዋል

Sendek Newspaper

Bole sub city behind Atlas hotel

Contact us