ከኦሮሚያ የፖለቲካ ፓርቲዎች የተሰጠ መግለጫ

Wednesday, 22 February 2017 12:00

 

1.  ኦሮሞ አቦ ነጻነት ግንባር (ኦአነግ)

2.  ኦሮሞ ነጻነት አንድነት ግንባር (ኦነአግ)

3.  ኦሮሞ ብሔራዊ ኮንግረስ (ኦብኮ)

4.  ኦሮሚያ ነጻነት ብሔራዊ ፓርቲ (ኦነብፓ)

 

በአሁኑ ወቅት በኢህአዴግ የሚመራው መንግስት ከተቃዋሚ የፖለቲካ ፓርቲዎች ጋር በመደራደር በአገሪቱ ውስጥ ሁለገብ ሰላምን ለማምጣት እያደረገው ያለውን እንቅስቃሴ ከልብ የምንደግፍ ሲሆን ነገር ግን ሂደቱ አቅጣጫውን ስቶ የባሰውን ችግር እንዳይፈጥር ያለንን ስጋት መግለጽ ብቻም ሳይሆን መስተካከል ያለባቸውን ጉዳዮች ከወዲሁ ለመጠቆም ነው።

 

ዛሬ ከኢህአዴግ ጋር ግንባር ቀደም ተደራዳሪ ሆኖ የቀረቡ አገር አቀፍ ፓርቲዎች ሁሉም የማያምኑበት ቢሆንም በኛ እምነት የአገራችን ትልቁ ችግር በኢትዮጵያ ከረጅም ዘመን ጀምሮ ተንሰራፍቶ የቆየው የብሔር ብሔረሰብ ጭቆና ነው። ይህን ሃቅ ደግሞ ገዢው ኢህአዴግ ከሁሉም የበለጠ ይገነዘባል የሚል እምነት አለን።

 

በተቃራኒው ግን ዛሬ ከኢህአዴግ ጋር እየተደራደሩ ያሉት አገር አቀፍ ፓርቲዎች አንዳንዶቹ በኢትዮጵያ የብሔር ብሔረሰብ መብት ጥያቄን የጎሳ ፖለቲካ በማለት የብዙሃን ሕዝብ የማንነት ጥያቅን ዝቅ በማድረግና በማሳነስ የሚከራከሩ ፓርቲዎች ናቸው። ስለሆነም እነዚህ ፓርቲዎች የራሳቸውን ትምክህተኛ ፍላጎት በሕዝብ ላይ በኃይል ለመጫን የሚያደርጉት ድርድር እንጂ የሰፊውን የኢትዮጵያ ብሔርብሔረሰቦችና ሕዝቦች መብት የሚጠብቅና የሕዝባችንን የመብት ጥያቄን የሚመልስ ነው የሚል እምነት የለንም። በመሆኑም ድርድሩ የይስሙላ ጉዳይ ሳይሆን የሕዝቦች የመኖርና ያለመኖር የሕልውና ጉዳይ ነው። ይህን አባባል ግልጽ ለማድረግ ኢህአዴግ በብሔሮቻቸውና በብሔረሰቦቻቸው ስም በክልል ደረጃ የተደራጁት ፓርቲዎችን ወደ ጎን በመተው ከአገር አቀፍ ፓርቲዎች ጋር ድርድር ሲጀምር የፕሮቶኮል ጉዳይ ካልሆነ በስተቀር እነዚህ ፓርቲዎች አሁን ያለውን ሕገ-መንግስት ለብሔርብሔረሰቦች የሰጠውን መብት የኢትዮጵያ ፌዴራላዊ የመንግስት አወቃቀርን የማይቀበሉና ለቀድሞ ዓይነት አሃዳዊ መንግስት የሚታገሉ በመሆናቸው ነው። የእነዚህ ፓርቲዎች ዓላማ ምንም ይሁን ምን የኛ ተቃውሞ መንግስት ለምን ከእነሱ ጋር ይደራደራል ማለት አይደለም። ፓርቲዎቹን ዓላማቸውን ለማሳካት ተግባቡም አልተግባቡም ከመንግስት ጋር መደራደር መብታቸው እንደሆነ እንገነዘባለን።

 

የኛ ጥያቄ እነዚህ ፓርቲዎች በስመ-የኢትዮጵያ አንድነት የብሔር ብሔረሰቦችን የማንነት ጥያቄንና የተገኘውን አንጻራዊ የመብት ጥያቄ ምላሽን ደብዛ እንዲጠፋ ተግቶ የሚሰሩ በመሆናቸው የኦሮሞንም ሆነ የሌሎች ብሔር ብሔረሰቦችን ውክልና ይዘው መደራደር ስለማይችሉ ድርድሩ እንደ ዋዛ የማይታይ ስለአልሆነና የመብትና የማንነት ጥያቄ ስለሆነ በአንድ ሀገር የክልል እና የፌዴራል ድርድር የሚባል ሊኖር ስለማይችል ድርድሩ ሁሉ አቀፍ እንዲሆንና የክልል ፓርቲዎችንም ሁሉ ያካተተ መሆን ይኖርበታል። ምናልባትም ይህ ድርድር እንደ የፓርቲዎች የጋራ ምክር ቤት ሁሉ በክልል ደረጃም ወደታች ይወርዳል ይባል ይሆናል። ነገር ግን እንደኛ እምነት ስለሕዝባችን መብት የምንነጋገረው ከክልሉ መንግስት ወይም ገዢ ፓርቲ ብቻም ሳይሆን በማንኛውም ደረጃ ባሉት ፓርቲዎችና ሌሎች ጉዳዩ ከሚመለከታቸው ወገኖች የሕዝባችን መብት ለመሸራረፍ ከሚሞክሩና ድጋፍ ከሚሰጡ ሁሉ ጋር በመሆኑ ነው።

 

በመሆኑም አሁን በድርድሩ እየተሳተፋችሁ ያላችሁት አገር አቀፍ ፓርቲዎችና ገዢው ፓርቲ ኢህአዴግ የክልል ፓርቲዎችን ያላቀፈ በተለይም የኦሮሞን ሕዝብ መብት ወደ ጎን የሚተው ድርድር ብዙም ርቀት ሊያስኬድ የማይችል መሆኑን ተገንዝባችሁ ለሁሉ አቀፍ ድርድር በር እንድትከፍቱ በጋራ እንጠይቃለን።

ድል የሕዝብ ነው

ከአራቱ የኦሮሞ የፖለቲካ ፓርቲዎች

የካቲት 13/2009

ፊንፊኔ

ይምረጡ
(0 ሰዎች መርጠዋል)
266 ጊዜ ተነበዋል

Sendek Newspaper

Bole sub city behind Atlas hotel

Contact us