You are here:መነሻ ገፅ»ዜና

እንግሊዝ ለየኛ ፕሮግራም የምታደርገውን የገንዘብ ድጋፍ አቋረጠች

Wednesday, 11 January 2017 14:02

·        የ“የኛ” ፕሮግራሞች ይቀጥላሉ

 

ወጣት ሴቶችን ማህበራዊ ተሳትፎ በማጎልበት ከሶስት ዓመታት በላይ በአዝናኝና አስተማሪ ፕሮግራሞቹ የቆየው “የኛ”፤ ከእንግሊዝ ዓለም አቀፍ የልማት ድርጅት የሚደረግለት ድጋፍ ቢቋረጥም ስራው እንደሚቀጥል የፕሮግራሙ ዳይሬክተር ወ/ሮ ሶሎሜ ታደሰ በትናንትናው ዕለት (ጥር 2 ቀን 2009 ዓ.ም) በሰጡት ጋዜጣዊ መግለጫ ተናገሩ።

ከሰሞኑ በተለያዩ መገናኛ ብዙሃን የተሰራጨው መረጃ የ“የኛ” ፕሮግራምን በሚገባ ካለመረዳት የመነጨ ነው ያሉ ዳይሬክተሯ፤ እንደተባለውም የእንግሊዙ ዓለም አቀፍ የልማት ድርጅት ለየኛዎች የሚሰጠውን የገንዘብ ድጋፍ በድንገት ያቋረጠው በፕሮግራሙ ይዘት ላይ ባለመስማማት ሳይሆን፤ በውስጣዊ የፖለቲካ ምክንያቱ እንደሆነ ተናግረዋል። በአሁኑ ወቅት እንግሊዝን በመምራት ላይ የሚገኘው የቀኝ ዘመሙ ፓርቲ የዕርዳታ አሰጣጡ በሚታይ ችግር ላይ የተመሠረተ እንዲሆን አስቦ የወሰደው እርምጃ እንደሆነ የተናገሩት ዳይሬክተሯ፤ የየኛ ፕሮግራም ግን ቀስ በቀስ የሚታይና ሴቶችን በማብቃት ዙሪያ በሰፊው የሚሰራ እንደሆነ ሊታሰብ ይገባል ብለዋል።

 

የኛ የሬዲዮ ድራማ፣ የቶክሾው እና የሙዚቃ ቡድን ለሚሰራው ፕሮግራም እና ለአባላቱ የሚከፈለው ክፍያ የተጋነነ ነው የሚሉ አካላት ጥያቄ አስነስተዋል በሚል ለቀረበላቸው ጥያቄ ዳይሬክተሯ ሲመልሱ፤ ስራው ልፋትና ድካም ያለው ሲሆን፤ ያለአንዳች መፈናፈኛ ለሚሰሩት ወጣት ሴቶች ደግሞ ክፍያው “የቅንጦት” ነው ሊያስብል እንደማይችል አስረድተዋል። የእንግሊዝ መንግስት ዕርዳታውን ያቋረጠው በውስጣዊ የፖለቲካ ችግሩ ብቻ ሳይሆን የኢትዮጵያም ፖለቲካዊ ችግርና ተከስቶ የነበረው አለመረጋጋትም ምክንያት ሆኖት እንደሆነ ለቀረበላቸው ጥያቄ “በፍፁም አይደለም” የሚል ምላሽ ሰጥተዋል።

 

የኛ ፕሮግራም ከተጀመረና ለአየር ከበቃ ከሶስት ዓመት በላይ ሲሆነው፤ ከእንግሊዝ ዓለም አቀፍ የልማት ድርጅትም ጋር በትብብር ሲሰራ አራት ዓመታት አልፈውታል። የገንዘቡን ድጋፍ የሚሰጠው አካል በየዓመቱ በሚደረገው ምርመራና ሪፖርት ጭምር የየኛዎች አጠቃላይ ፕሮጀክት ውጤቱ በ“ኤ” ደረጃ ይመለከተው እንደነበርም በመግለጫው ተወስቷል።

 

በአሁኑ ወቅት እስከ 2018 (እ.ኤ.አ) የነበረው የገንዘብ ድጋፍ ድንገት የተቋረጠ ቢሆንም እስከ ምዕራፍ አስር ያሉ ስራዎች ሙሉ በሙሉ እየተሰሩ እንደሚገኝም በመግጫው ተጠቁሟል። በቀጣይም ከሌሎች ዓለም አቀፍ የትብብር ድጋፍ ሰጪ አካላትና ከሀገር ውስጥ ተቋማት ጋር በመነጋገር የ “የኛ” ፕሮግራም ቀጣይ እንደሚሆን ያላቸውን እምነት ዳይሬክተሯ ወ/ሮ ሶሎሜ ታደሰ ሲናገሩ ሰምተናል። ከ“የኛ” ፕሮግራም መደበኛ አድማጮች መካከል 76 በመቶዎቹ ወጣት ሴቶች ሲሆኑ፤ በአዲስ አበባና በአማራ ክልል በአጠቃላይ ከስምንት ሚሊዮን በላይ አድማጮች ያሉት አዝናኝና አስተማሪ የሬዲዮ ፕሮግራም እንደሆነም በመግለጫ ተወስቷል።  

ይምረጡ
(1 ሰው መርጠዋል)
426 ጊዜ ተነበዋል

Sendek Newspaper

Bole sub city behind Atlas hotel

Contact us